कोणी सांगेल का?

प्रेम म्हणजे काय असतं
हे कोणी मला सांगेल का?
नयनांतून जन्म घेऊन
शब्दसुरांच्या मार्गाने ते
ओठांतून निघून
हृदयापाशी पोहोचणे
याला प्रेम म्हणतात का?
आपल्याला आवडणाऱ्या
एका व्यक्तीच्या सहवासात
मिळालेले आनंदाचे क्षण
हृदयाला टोचल्यावर
जो जिव्हाळा निर्माण होतो
याला प्रेम म्हणतात का?
दोन व्यक्तींनी एकमेकांना समजणं
एकमेकांच्या भावना जाणून
अंत:करणातून सर्वस्वी
त्यालाच आपलं मानणं
याला प्रेम म्हणतात का?
एकाच्या सुखासाठी दुसर्याने
स्वत:च्या जीवनात दु:ख पेरणं
त्या पेरलेल्या दु:खातही
स्वर्गसुखाचा अनुभव घेणं
याला प्रेम म्हणतात का?

- रवी विश्वासराव (कवी)
(मी माझा असा एकटा! - काव्यसंग्रह)